استانادا «ەۋروپالىق وداق – قازاقستان: شيرەك عاسىر ىنتىماقتاستىق» دەرەكتى ءفيلمى كورسەتىلدى، دەپ جازادى Qamshy.kz اقپارات اگەنتتىگى.
بۇگىن ەۋروپالىق وداق پەن قازاقستان رەسپۋبليكاسى اراسىنداعى ديپلوماتيالىق قارىم-قاتىناستاردىڭ 25-جىلدىعىنا وراي «ەۋروپالىق وداق – قازاقستان: شيرەك عاسىر ىنتىماقتاستىق» دەرەكتى ءفيلمىنىڭ كورسەتىلىمى ءوتتى. دەرەكتى فيلم قازاقستانداعى ەو وكىلدىگىمەن ق ر سىرتقى ىستەر مينيسترلىگىنىڭ جانە ەۋروپالىق سىرتقى ىستەر قىزمەتىنىڭ قولداۋىمەن مەملەكەتتىك تىلدە دايىندالدى.
دەرەكتى فيلمدە ىنتىماقتاستىقتىڭ شيرەك عاسىرلىق تاريحى باستى وقيعالار تىزبەگىمەن باياندالادى. اتاپ ايتقاندا قازاقستان سىرتقى ساياساتىنىڭ قالىپتاسۋى، العاش ەۋروپالىق ينۆەستيسيالاردىڭ كەلۋى، «ەۋروپاعا جول» باعدارلاماسى، قاۋىپسىزدىك، ەكونوميكا، ءبىلىم بەرۋ، مادەنيەت سالاسىندا سەرىكتەستىكتىڭ دامۋى، كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويۋ، ەۋرووداقتىڭ ورتالىق ازيا بويىنشا جاڭا ستراتەگياسىن ازىرلەۋ.
كورسەتىلىم الدىندا باسپا ءسوز كونفەرەنسياسى ءوتىپ، قازاقستانداعى ەو ەلشىسى ترايان حريستەا، ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو، 2001-2003 جج. بەلگيا كورولدىگىندەگى قازاقستان رەسپۋبليكاسى ەلشىسى، تۇڭعىش ق ر سىرتقى ىستەر ءمينيسترى تولەۋتاي سۇلەيمەنوۆ ءسوز سويلەدى.
قازاقستانداعى ەو ەلشىسى ترايان حريستەا: "ءبىز دۇربەلەڭ گەوساياسي وزگەرىستەر مەن جالپى ادامزات قۇندىلىقتارى شەتكەرى بولىپ نەمەسە ۇمىتىلىپ جاتقان الەم زامانداستارىمىز. سوندىقتان قاتىناستارىمىزدىڭ شيرەك عاسىر تاريحى ورتاق قۇندىلىقتار مەن مۇددەلەرگە نەگىزدەلگەن ەكىجاقتى قارىم-قاتىناستاردىڭ الداعى كوپتەگەن جىلدارى ءۇشىن ماڭىزدى تۇعىرناماسى بولاتىنىنا سەنىمدىمىن"، - دەپ اتاپ ءوتتى.
ءفيلمنىڭ نەگىزىندە - ەۋروپالىق كوميسسيانىڭ مۇراعاتتىق بەينەجازبالارى، ىنتىماقتاستىق دامۋىنىڭ كۋاگەرلەرى مەن تىكەلەي قاتىسۋشىلاردىڭ ەكسكليۋزيۆتى سۇحباتتارى (ەو سىرتقى ساياسات جونىندەگى كوميسسارى بەنيتا فەررەرو-ۆالدنەر، ورتالىق ازيا بويىنشا ەو ارنايى وكىلى پەتەر بۋريان، ەۋروپارلامەنت دەپۋتاتى يۆەتا گريگۋلە-پەتەرسە، تۇڭعىش ق ر سىرتقى ىستەر ءمينيسترى تولەۋتاي سۇلەيمەنوۆ، بەلگياداعى ق ر ەلشىسى الماز حامزايەۆ، قازاقستانداعى ەۋروپالىق وداق وكىلدىگىنىڭ بۇرىنعى جانە قازىرگى باسشىلارى جانە كوپتەگەن باسقالارى). فيلم كەيىپكەرلەرى ەستەلىكتەرىمەن، جۇمىس بارىسىندا ەسىندە قالعان ساتتەرمەن، سونىمەن قاتار، ەۋروپا مەن قازاقستان ءرولى جانە ءوزارا قابىلداۋى، ەۋروپالىق جانە قازاقستاندىق ديپلوماتيا اراسىنداعى ايىرماشىلىقتار تۋرالى ويلارىمەن بولىسەدى.
ايتا كەتسەك، ەۋروپالىق وداق پەن قازاقستان رەسپۋبليكاسىنىڭ اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمگە (كاىك) 2015 جىلدىڭ 21 جەلتوقسانىندا قول قويىلعان بولاتىن. كاىك-نىڭ نەگىزگى بولىمدەرى 2016 جىلدىڭ 1 مامىرىنان باستاپ ۋاقىتشا جۇزەگە اسىرىلا باستادى. كەلىسىم 29 سالاداعى ىقپالداستىق اياسىن كەڭەيتىپ، ەو مەن قازاقستان اراسىنداعى ساۋدا-ەكونوميكالىق جانە ينۆەستيسيالىق، ەنەرگەتيكا، كولىك، قورشاعان ورتانى قورعاۋ جانە كليماتتىڭ وزگەرۋى، جۇمىسپەن قامتۋ، ەڭبەك قاتىناستارى، مادەنيەت، ءبىلىم جانە عىلىمي زەرتتەۋ سالالارىنداعى ىقپالداستىققا جول اشتى. 1991-2014 جج. ارالىعىندا ەو قازاقستاندا جالپى سوماسى 180 ملن قۇرايتىن 350-دەن استام جوبانى تىكەلەي قارجىلاندىردى. بۇل جوبالار ق ر ۇكىمەتىنىڭ ءار ءتۇرلى مينيسترلىكتەرى، ۆەدومستۆولارى مەن كوميتەتتەرىنە ساياسي كەڭەس جانە تەحنيكالىق كومەككە باعىتتالدى.
